«Ағиҙел»журналының 100 йыллыҡ юбилейында.

12 апрель, “Ағиҙел” журналының 100 йыллығына арналған сарала тамашасы булырға яҙҙы әле миңә, һәм әлбиттә, был тамаша бик рухлы , хисле тәьҫроттар ҡалдырҙы.
Теүәл өс сәғәткә һуҙылған йөкмәткеле тамашала журналыбыҙҙың бер быуатлыҡ тарихы ғына түгел, республикабыҙҙың данлы үткәне лә сағылдырылды.
Байрамда башҡорт халҡының билдәле шәхестәре, милләтебеҙҙең әҙиптәре һәм баҫманың башҡа тоғро дуҫтары ҡатнашты. Сара Республика Башлығы Радий Фәрит улы Хәбировтың ҡотлауын Премьер-министр урынбаҫары Урал Килсенбаевтың уҡып ишеттереүенән башланды. Һәм ул журналдың баш мөхәррире Мөнир Ҡунафинға Салауат Юлаев орденын тапшырҙы.
Шулай уҡ журналдың хеҙмәткәрҙәре Әхмәр Үтәбай, Гөлнара Хәлфетдинова, Луиза Кирәева бүләкләнде.
Тантана барышында Башҡорт ҡатын-ҡыҙҙары йәмғиәтенең иң ҙур наградаһы — билдәле әүҙемсе Рабиға Ҡушаева исемендәге “Ҡатын-ҡыҙ – милләт әсәһе” миҙалы менән бүләкләү ҙә булды.
Юбилей уңайынан “Ағиҙел” журналы биттәрендә баҫылған иң шәп проза һәм поэтик әҫәрҙәргә Башҡортостандың халыҡ шағиры, яҙыусы, драматург, совет һәм башҡорт әҙәбиәте классигы Мостай Кәрим исемендәге премияға конкурс иғлан ителгән ине, тантана барышында был конкурстың еңеүселәрен бүләкләп үттеләр.Премияны Мостай Кәримдең ҡыҙы Әлфиә Мостай ҡыҙы тапшырҙы. Әлфиә Мостай ҡыҙы, Мостай Кәрим исемендәге фонд исеменән Башҡортостандың Оло инәйе — Мәрйәм Сабирйән ҡыҙы Бураҡаеваны күркәм юбилейы менән ҡотланы.
«Проза» номинацияһында Мостай Кәрим исемендәге премия “Яратам тип әйтеп өлгөрмәнем” хикәйәһе өсөн яҡташыбыҙ Гөлсирә Ғиззәтуллинаға тапшырылды.
Башҡортостандың халыҡ яҙыусыһы Ноғман Мусин исемендәге премияның еңеүселәре билдәләнде, премияны еңеүселәргә Ноғман Мусиндың ҡыҙы тапшырҙы.
Һәр быуын яҙыусылары алмашлап сәхнәгә сығып ҡотлау һүҙҙәрен еткерҙеләр, үҙҙәренең шиғырҙарын бик рухлы итеп яттан һөйләнеләр. Башҡортостандың халыҡ яҙыусыһы Таңсулпан Ғарипованың һәм Башҡортостандың халыҡ артисткаһы Алһыу Бәхтиеваның яңы йыр премьераһын бергәләп башҡарыуы көтөлмәгән, үҙенсәлекле яңылыҡ булды.
Иң ҡыуанып, ғорурланған мәлем беҙҙең райондан сыҡҡан арҙаҡлы яҡташтарыбыҙҙы күреү ине: яҙыусыларыбыҙ Хәсән Назар, Мәрйәм Бураҡаева, Гөлсирә Ғиззәтуллина…
Сәхнәгә бер түгел, ике мәртәбә сығып йырлаған моңло тауышлы Заһир Иҫәнчурин, Нәжип Юлдашбаев…
Ә райондашыбыҙ Булат Ишемғолдың 1930-сы йылдарҙа «Октябрь» («Ағиҙел») журналының мөхәррире булып эшләүен һеҙ белә инегеҙме ? Әлбиттә,уның исемен дә, хеҙмәттәрен дә әйтеп үттеләр.
«Ағиҙел” журналы мәңге йәшәһен, башҡорт рухлы булып ҡалһын тигән теләктә ҡаламын.

Китапханасы Гөлкәй Әлмөхәмәтова.